మా నాన్నగారు_ బొమ్మలకొలువు ( 2)posted

కొలువులో మెట్లు పెట్టినప్పుడు పై మూడు మెట్లు కూడా దేవీ దేవతా విగ్రహాల తోనే నింపే వాళ్ళం... ఆ మెట్ల వెంట ఆరి వెలిగే బల్బు లైటింగ్ పెట్టడం బొమ్మలన్నీ ముఖాలు కనిపించే లాగా ఉండాలంటూ నాన్నగారు వాటిని అమర్చేవారు.. మేము విరిగిన బొమ్మల్ని బాగు చేసినప్పుడు వాటితో కొత్తగా ఏదైనా తయారు చేసినప్పుడు ఆయన చాలా సంతోషించేవారు. కాకినాడలో ఉన్నప్పుడు చాలా మంచి కొలువు ఏర్పాటు చేశాము

              

             మెట్ల కన్నా చుట్టూ పల్లెటూరి వాతావరణం.. కోసం పండగ కన్నా ముందుగానే ఆవాలు పెసలు లాంటివి రాత్రి నానబోసి ఒక పూటంతా చిల్లుల పళ్లెంలో వదిలేసే వాళ్ళం .మొలకలు వచ్చేవి .బట్టలకు వచ్చిన అట్ట పెట్టెల్లో మట్టి నింపి వాటిలో ఈ మొలకలు చల్లే వాళ్ళం.. రెండు మూడు రోజుల్లో మొలకలు బాగా పైకి వచ్చి చేను లాగా అనిపించేది. ఆ చేను మధ్యలో నాలుగు పుల్లలు తో పందిరి వేసి మంచె కట్టేవాళ్ళం.. అంతేనా ఏదో ఒక మూలలో ఇసక ఎత్తుగా పోసి మెట్లు గట్టి పైన గుడి ఏర్పాటు చేసే వాళ్ళం.. అప్పట్లో తీర్థాలలో ఐదు పది రూపాయలకు స్కూటర్లు గుర్రబ్బండి కార్లు లారీలు ప్లాస్టిక్ బొమ్మలు వచ్చేవి.. ఏవి చూసినా ఒక ఐడియా తో కొలువులోకి అలా అయితే బాగుంటాయి ఇలా అయితే బాగుంటాయి అంటూ బొమ్మలు చాలా కొనేవాళ్ళం

             ఒకసారి రోడ్డు మీద పెట్టిన పింగాణీ బొమ్మలలో ఒక టి సెట్ నాకు చాలా నచ్చింది. ఆది కొనమని ఇంటికి వచ్చి  ఒకటే పేచి నాన్న కి ఇక కొనక తప్పలేదు ఇదే కాకుండా బువ్వాలాటల సామాన్లు స్టీలు గ్యాస్ స్టవ్ కుక్కరు వాటితో సహా రెండు బిందెలు  ఇవన్నీ కూడా స్టీలు సామాను షాప్ లో చూసి కొనే వరకు గొడవ చేస్తే నాన్న ...అమ్మా నువ్వు ఇంటర్ కి వచ్చావే.. బువ్వాలాటల బొమ్మలు కావాలా అని నవ్వుతూనే ఆయనకి నచ్చి కొనేశారు పైగా ఇంటికి వచ్చి అమ్మతో రెండు స్టీలు బిందెలు తెచ్చాను నీళ్లు పట్టుకోవచ్చు అని అవి చూపించి నవ్వారు ఆ సామానుతో మా అమ్మాయి ఆడుకునేది దాంట్లో కత్తిపీట విరిగిపోతే మా వారు రివిట్ చేయించడం కొసమెరుపు

                      విచిత్రం ఏమిటంటే నన్ను బొటానికల్ టూర్ కి సౌత్ ఇండియా అంతా తిప్పినప్పుడు అందరు పిల్లలు రకరకాల చంప పిన్నులు రబ్బర్ బాండ్లు గొలుసులు చీరలు కొనుక్కుంటే నేను మాత్రం మద్రాస్ లో పింగాణీ బొమ్మలు కొన్ని కొని జాగ్రత్తగా ప్యాక్ చేసి పట్టుకొచ్చాను అంతేకాదు ఒకసారి ఏటికొప్పాక కూడా వెళ్ళాము అక్కడ కొయ్య బొమ్మలు చాలా ఫేమస్ అక్కడ నుంచి రకరకాల పిట్టలు ఫ్యామిలీ సెట్.. దీనిలో నాన్న బొమ్మ లోపల అమ్మ అమ్మ లోపల ఒక పాప ఒక బాబు ఉంటారు ఇలాంటివే ముసుగు అమ్మాయిల బొమ్మలు ఉండే అమ్మాయిల సెట్ కూడా ఉంది.. ఏటికొప్పాకలో చిన్నచిన్న పిట్టలు చాలా అందంగా ఉండేవి లక్కపిడతలు చాలా కొనుక్కుని వచ్చాను.

అసలు సంగతి మరిచాను మా అక్క పూసలతో కుర్చీలు సోఫాలు. ఉయ్యాలలు అమ్మాయిల బొమ్మలు అప్పట్లో చాలా అల్లేవారు చూసిన అన్నీ కూడా అది అల్లుతానని అడిగితే నాన్న ఆ పూసలు వైర్లు అన్నీ అమర్చి పెట్టేవారు అది అల్లిన వాటిని చూసి మురిసిపోయేవారు.. ఇవే కాకుండా పాత నైట్ బల్బులని బోర్లించిన కొబ్బరి చిప్ప మీద పెట్టి బ్రాహ్మణుడు క్రైస్తవుడు ముస్లిం బొమ్మలు తయారు చేసే వాళ్ళం... అక్క ఆ బల్బు షేపు చూసి దేనికి వాడితే బాగుంటుంది చెప్పి ఆ బొమ్మ తయారు చేసేది.. తాటి టెంకలు తెల్లగా మెరిసిపోయేలా కడిగి

వాటితో రుషులు మునులు తలకాయలు తయారు చేసేది... 

              కోడిగుడ్డు గుల్లలు మా నా స్నేహితుల దగ్గర అడిగి తెచ్చుకుని నీళ్ళలో పోసి తెల్లగా కడిగి వాటిమీద ఐడ్రాపర్ అంటించి నిలువుగా నుంచోపెట్టి పక్కన నల్ల రంగు వేసి పెంగ్విన్లు తయారుచేసింది నిజంగా చాలా గొప్ప సృజనాత్మకత ఉండేది దానికి... ఈ మధ్యనే అంతర్జాలంలో  న్యూస్ పేపర్ల గొట్టాలతో బొమ్మలు తయారుచేయడం చూసి నేను చేసి అక్కకు చూపించాను అది ఇంకా చాలా ఇంట్రెస్ట్ గా బొమ్మలు చాలా చేస్తోంది

       బొమ్మల కొలువుకి మేము పిలిచిన పేరంటాలు కాకుండా నాన్న ఆఫీస్ లో కూడా మా పిల్లలు బొమ్మలు పెట్టారని మామూలు కొలువు కాదు వాళ్ళు చాలా సృజనాత్మకంగా తీర్చిదిద్దారని చెప్పి వాళ్ల కొల్లీగ్స్ నీ ఆఫీసులో ఆడవారిని కూడా పిలిచేవారు మొత్తానికి ఒకసారైతే ఎవరో వచ్చి చూస్తారని తొమ్మిది రోజులు దాటినా కూడా తీయని ఇవ్వలేదు హారతి ఇప్పించి

ఒక బొమ్మ కదిపి వాళ్ల కోసం అలాగే ఉంచారు..

    

              పెళ్లి అయ్యాక అత్తవారింటికి వచ్చి వాళ్ళ ఇంట్లో బొమ్మల కొలువు ఆనవాయితీ లేదు అన్నప్పుడు నా బాధ అంతా ఇంతా కాదు... నిజంగా చాలా బాధ వేసింది... అయితే మధ్యలో ఒకసారి స్కూల్ లో తెలుగు భాష ఉత్సవాలు చేసి పిల్లలకి అన్ని పండుగల ఆనవాయితీలు తెలిసేలా గా కార్యక్రమం చేయమంటే నేను టీచర్లు అందరితో కలిసి చాలా పెద్ద బొమ్మల కొలువు ఒక పార్కు వినాయక చవితి పందిరి గ్రామీణ వాతావరణం జంతుప్రదర్శనశాల అన్ని ఏర్పాటు చేసి పిల్లల చేత చాలా బొమ్మలు కూడా కాగితాలతో తయారు చేయించి నా ఇష్టాన్ని ఆ విధంగా తీర్చుకున్నాను

        ఇప్పుడు మా మేనకోడలు తో దసరా బొమ్మల కొలువు కి హాజరై చాలా ఏళ్ల జ్ఞాపకాలని మీతో పంచుకుంటున్నాను నాన్న ఉంటే మనవరాలి బొమ్మల కొలువు చాలా మురిసి వుందురు . ఈ ఫోటోలో కనిపించే జిరాఫీలు కుర్చీ టేబుల్ మా అక్క చేసిన న్యూస్ పేపర్ బొమ్మలు అలాగే నేను చేసిన కొబ్బరి చిప్ప బల్బులు బొమ్మలు పెడుతున్నాను.

     నిన్న నా పోస్ట్ కి ఎంతో ఎంతో ఆదరంతో చదివి మీ కామెంట్లు జ్ఞాపకాలు మాతో పంచుకున్నందుకు చాలా సంతోషంగా అనిపించింది. ముఖ్యంగా సుసర్ల శాస్త్రి గారు పండగ హడావుడి వల్ల రిప్లై ఇవ్వడం లేట్ అవుతుంది అయినా మీ స్పందన మాకెంతో ఆనందం. నిన్నే మీ అందరి కామెంట్లు మా అమ్మాయి కూడా చదివి అందరూ చాలా బాగా రాస్తున్నారు అమ్మా అని మెచ్చు కుంది..

మరి ఉంటాను

మీ తల్లాప్రగడ శ్రీదేవి